ओमकार संवाददाता
चिनका विदेशमन्त्री वाङ यीको नेपाल भ्रमणसंगै लिपुलेकको बिषयलाई लिएर ग्रेटर नेपालले प्रेस विज्ञप्ति निकालेको छ ।
मित्र राष्ट्र चीनका विदेशमन्त्री वाङ यीको नेपाल भ्रमणको दोस्रो दिन आज नेपाल र चीनका विदेश मन्त्रीबिच द्विपक्षीय हितका विषयमा औपचारिक वार्ता हुने कुरा प्रकाशमा आएपछि ग्रेटर नेपाल राष्ट्रवादी मोर्चाको गम्भीर ध्यानाकर्षण भएको छ ,विज्ञप्तिमा भनिएको छ ।
यस अवसरमा मोर्चा दुवै देशका विदेशमन्त्रीहरूको ध्यान सन् २०१५ को मे १५ को दिन बेजिङमा चीन र भारतका प्रधानमन्त्रीले संयुक्त रूपमा जारी गरेको प्रेस विज्ञप्तितर्फ आकृष्ट गर्न चाहन्छ, जसमा नेपालको लिपुलेकलाई चीन र भारतबिचको अन्तर्राष्ट्रिय व्यापार नाका बनाउने उल्लेख गरी नेपालको सार्वभौमसत्ता र भौगोलिक अखण्डतामाथि अतिक्रमण र हस्तक्षेप गरिएको थियो । नेपालको सहमति र अनुमतिविना गरिएको त्यो निर्णयको ग्रेटर नेपाल राष्ट्रवादी मोर्चा आज पनि घोर भर्त्सना गर्दछ ।
विज्ञप्तिमा अगाडि भनिएको छ,यही दुःखदायी घटनाको पृष्ठभूमिमा ग्रेटर नेपाल राष्ट्रवादी मोर्चा चीनका विदेशमन्त्रीले यस अवसरमा लिपुलेक प्रकरणमा भएको गल्ती चीनका पक्षबाट सच्याउने सार्वजनिक वचनबद्धताका साथ गर्नुहुनेछ भन्ने अपेक्षा गर्दछ । लिपुलेकमा नेपाल–चीन सिमाना छुट्ट्याउने स्तम्भ रहेको स्थान नेपाल, भारत र चीनबिचको त्रिदेशीय विन्दु हो भन्ने स्थापित हुनै नसक्ने अवस्थामा लिपुलेकमाथि चीन र भारतले अन्यथा निर्णय गर्नु घोर आपत्तिजनक कुरा हो । वास्तवमा नेपाल, चीन र भारतबिचको त्रिदेशीय विन्दु लिम्पियाधुरा हो भन्ने जान्दाजान्दै चीन र भारतले लिपुलेकको कुमारीत्व भङ्ग गर्ने चेष्टा गर्नु नेपाल र नेपालीका निम्ति सह्य हुने कुरा होइन । तसर्थ मोर्चा नेपालका परराष्ट्रमन्त्रीलाई समेत आफ्ना समकक्षीसँगको वार्तामा यो विषयलाई पनि एजेन्डा बनाउन आग्रह गर्दछ ग्रेटर नेपालका अध्यक्ष फणीन्द्र नेपालद्वारा हस्ताक्षरित विज्ञप्तिमा भनिएको छ।
पढ्नुस् विज्ञप्तिको पुर्णपाठ
प्रतिकृया दिनुहोस