काठमाडौँ, भदौ २० । पुर्वप्रधानमन्त्री डा. बाबुराम भट्टराईले हिन्दु धर्म विरोधी अभिव्यक्ति दिएको भन्दै चौतर्फी विरोध भएको छ । विहीबार समता फाउण्डेशनले गरेको कार्यक्रममा बोल्दै डा. भट्टराईले दलित समुदायलाई हिन्दु धर्मले विभेद गरेको कारण सोही धर्म मानिरहनुपर्नेमा औचित्य नभएको बताएपछि उनि विवादमा तानिएका हुन्
।
डा. भट्टराईले धार्मिक द्वन्द भड्काउन खोजिएको भन्दै सामाजिक संजाल र संचारमाध्यमहरुमा टिकाटिप्पणी सुरु भएको छ । राष्ट्रिय प्रजातन्त्र पार्टीका अध्यक्ष कमल थापाले बाबुराम भट्टराईको अभिव्यक्तिलाई उदृत गर्दै समाजमा भ्रम फैलाएको आरोप लगाएका छन् । उनि लेख्छन, ‘
चातुर्वण्यं मया सृष्टं गुणकर्मविभागशः।
तस्य कर्तारमपि मां विद्ध्यकर्तारमव्यम्।।
स्वयं भगवान श्रीकृष्णले गितामा जन्मको आधारमा होईन,गुण र कामको आधारमा समाज व्यवस्था गरेको उल्लेख छ। भ्रम सिर्जना गरेर सार्वजनिकरुपमा धर्मपरिवर्तन गर्न उक्साउने कार्य अपराध हो ।’
त्यस्तै ओम कुमार थापाले पनि भटटराईको अभिव्यक्तिको विरोध गर्दै ट्वीटरमा लेखेका छन् , ‘बाबुराम भट्टराईको काम जहिल्यै पनि मान्छे उचाल्नमै सिमित रहने भयो । समस्याको सही समाधान निकाल्न भन्दा पनि बल्झाउन खप्पिस भट्टराईले कसको के स्वार्थमा बोल्दैछन् रहस्यमय देखिँदैछ । अब दलितहरुलाई उचालेर हिन्दु धर्ममाथि प्रहार गर्ने यिनको दुर्नियत कदापी सफल हुन्न। ’
डा. भट्टराईले अम्बेडकरको प्रसंग स्मरण गर्दै दलितहरुलाई भनेका थिए ‘कि त हिन्दू धर्मशास्त्र सच्याउनुपर्छ कि त तपाईंहरुले त्यो परित्याग गर्नुपर्छ । हिन्दूत्वको नाममा जातपात प्रथा कायम गर्नेमाथि अन्तर्राष्ट्रिय समुदायले किन नाकाबन्दी नलगाएको ? यो प्रश्न हिँजो पनि उठेको थियो । धर्मको विषय भएकाले यसमा ती समुदायमा सामान्य विषय उठे पनि कोही निर्णयमा पुग्दैनन् ।
पूर्वप्रधानमन्त्री डा। भट्टराईले जातपात प्रथा मानवअधिकारको उल्लंघन भन्दै ऋग्वेदबाटै जातीय बिभाजन गरिएको बताएका थिए । दलितलाई मान्छे नै नमान्ने हिन्दू धर्म मान्ने दलितहरुमाथि समेत उनले प्रश्न उठाएका थिए ।
आफ्नो अभिव्यक्तिलाइ गलत रुपमा व्याख्या हुनसक्ने अनुमान गर्दै डा. भट्टराईले अन्तमा भने, ‘ मैले बोलेँ भने डलर खाएर बोल्यो भन्छन् । यसमा तपाईंहरु बोल्नुपर्छ । पाप लाग्छ भने मलाई लागोस् तर तपाईंहरु हिन्दू धर्म किन स्वीकार गर्नुहुन्छ ? त्यसमा सुधार हुँदैन भने तपाईंहरुले किन मान्ने ? अम्बेडकर आफैं हिन्दू भएर जन्मिए, तर जातीय विभेदका कारण मर्ने बेलामा बुद्ध धर्म अँगाले ।
प्रतिकृया दिनुहोस