दोलखाको उत्तरतर्फ प्रवेश गर्ने मुख्य मार्ग दोलखा सिंगटी सडकखण्डको सुन्द्रावती खोलामा आएको बाढीले जिप पल्टाउँदा एक जनाको मृत्यु भएको छ भने दुईजना गम्भिर घाइते भएका छन् । मृत्यु हुनेमा दोलखास्थित तामाकोसी गाउँपालिका वडा नम्बर ३ बस्ने २४ वर्षका अनिस पोख्रेल रहेको जिल्ला प्रहरी कार्यालय दोलखाले जनाएको छ ।
बिहीबार लामाबगरबाट चरिकोटतर्फ आइरहेको बा १९ च ४३९० नम्बरको इको स्र्पोट गाडी गएराती ११ बजेतिर खोलाले बगाएको हो । दोलखाका प्रहरी प्रमुख डिएसपी मान बहादुर राइले गाडी दुर्घटना भएपछि रातको १२ बजे आफुहरुलाई स्थानीयले खबर गरेको र प्रहरी परिचालन भई स्थानीय र प्रहरी मिलेर दुई जना घाइतेको उद्धार गरिएको जानकारी दिए ।
घाइते हुनेहरुमा रामेछापको लिखु गाउँपालिका २ का चालक पवन पौडेल र दोलखाको तामाकोसी ३ का गाडी साउ बिकज पोख्रेल रहेका छन् । उनीहरुको चरिकोटस्थित प्रस्तावित चरिकोट अस्पतालमा उपचार भइरहेको दोलखाका प्रहरी प्रवक्ता यज्ञनन्द शाहले जानकारी दिए ।
मृतक पोख्रेलको शव गएराती निकाल्न नसकेपछि शुक्रबार विहान मात्र निकालेर चरिकोट ल्याइएको प्रवक्ता शाहले बताए । जिप भने तत्काल निकाल्न नसकिने र त्यसका लागि मेसिनको प्रयोग गर्नुपर्ने प्रहरीले जनाएको छ ।
प्रतिकृया दिनुहोस