पथरी – ०६९ सालमा आफ्नै गाउमा वस्ने सुस्त मनस्थितिकी महिलामाथि बलात्कार गरी फरार भएका मोरङको कानेपोखरी–७ का ३१ वर्षीय रामु गुरुङ ७ वर्ष पछि पक्राउ परेका छन् ।
प्रहरीले घटना भएको लामो समयपछि उनलाई पक्राउ गर्न सफल भएको हो । इलाका प्रहरी कार्यालय पथरीका डीएसपी दिलिप गिरी नेत्रृत्वको टोलीले बेलबारी नगरपालिका–३ बाट पक्राउ गरेको हो ।
गुरुङले २०६९ साल कात्तिक १७ गते बेलुका सुस्त मनस्थितिकी ४५ वर्षीय महिलामाथि बलात्कार गरेका थिए । बलात्कार गरिरहेका बेला स्थानीय बासिन्दाले देखेपछि उनी भागेका थिए ।
घटना लगत्तै भागेर भारत पुगेका उनी ५ वर्ष पछि नेपाल आएका थिए । भारतबाट फर्किएपछि विगत २ वर्ष देखि बेलबारीमा जग्गा दलालीको काम गरिरहेको सुचना पाएपछि प्रहरीले खोजी गरी उनलाई पक्राउ गर्न सफल भएको डीएसपी गिरीले बताए ।भारतमा रहँदा पञ्जावको प्लाइउड फ्याक्ट्रिमा काम गरेको खुलेको गिरीको भनाइ छ ।घटना गराएपछि बिहे गरेर घरजम बसाएका उनी अहिले बेलबारीमा डेरा खोजेर श्रीमती र एक छोरीसहित बस्दै आएको खुलेको प्रहरीको भनाइ छ ।
घटनापछि भागेका उनी विरुद्ध प्रहरीले फरार प्रतिवादी बनाएर जवरजस्ती करणी मुद्दा चलाएको थियो ।जिल्ला अदालत मोरङले २०७४ साल जेठ १ गते बलात्कार घटनामा दोषी ठहर गर्दै १० वर्ष कैद सजायको फैसला सुनाए पनि गुरुङ पक्राउ परेका थिएनन् ।जवरजस्ती करणीमा पाँच र सुस्त मनस्थितिकी महिलामाथि करणी गरेकोमा थप पाँच गरेर गुरुङ विरुद्ध १० वर्ष कैद सजायको फैसला अदालतले गरेको थियो ।
घटनापछि पक्राउ पर्ने डरले भारत पुगेको र नेपाल फर्किएर जग्गा दलाली गर्दै .गर्दा पक्राउ गरिएका गुरुङलाई आज आइतबार जिल्ला अदालत मोरङमा पेस गरिने डीएसपी गिरीले बताए ।
प्रतिकृया दिनुहोस